И. Я. Яковлев çуралнӑранпа кӑçал 175 çул çитрĕ. Чăвашсене çутта кăларакан сумлă та чаплă педагогăн Иван Яковлевич Яковлевăн ятне Раççейре те, ун тулашĕнче те анлă пĕлеççĕ. Вăл 1848 çулхи ака уйăхĕн 25-мĕшĕнче Чĕмпĕр кĕпĕрнинчи Пăва уесне кĕрекен Кăнна Кушки ялĕнче çуралнă.

И. Я. Яковлев юбилейне халалланӑ мероприятисене Чурачӑкри вӑтам шкулта вĕренекенсем те хастар хутшӑнаççĕ. Ака уйӑхĕн 26-мĕшĕнче ялти Культура çуртĕнче «И.Я. Яковлев – чӑваш халӑхĕн улӑпĕ» мероприяти иртрĕ. Ӑна Иванова Н.В. тата Васильева Л.А. библиотека ĕçченĕсем ертсе пычĕç. 10-11 класра вĕренекенсем аслӑ вĕрентекенĕмĕр çинчен документаллӑ фильм пӑхрĕç, унӑн пултаруллӑ ĕçĕсене аса илчĕç, чӑваш халӑхне панӑ халалне вуларĕç. Патриархӑмӑр пултарулӑхне аван пĕлни викторина пĕтĕмлетĕвĕ те кӑтартрĕ. «И. Я. Яковлев – чӑваш халӑхĕн улӑпĕ» викторинӑна хутшӑннӑ ачасенчен 7-шĕ чи пысӑк балл пухса 1-мĕш вырӑна тухма пултарчĕç, дипломсем илчĕç, 2-мĕш вырӑн – 3, 3-мĕш вырӑн – 2 ача çĕнсе илчĕ. Саламлатпӑр! Малашне те çапла маттур пулӑр!